Manhole
لقصة ديال لفلم
كيعادو لقصة ديال واحد خينا خدام مانادجر فواحد الشركة و قريب يتزوج, الناس لي خدامين معاه دارو ليه وحد لحفلة نهار قبل الزواج ديالو , ملي سلاو و خرجو من البار لي كانو فيه هنأوه على الزواج ديالو و مشاو يكملو سهرة ديالهم فبار اخور, خونا كان راجع لدارو حيث خصو يرتاح حيث تابعو لعرس معا الصباح ولكين فالطريق ضرو الراس و جاتو الدوخة و طاح.
ملي فاق لقا راسو طايح فحفرة و لفخد ديالو كيخرج منها الدم, بدا كيراجع مسلسل الاحداث من قبل تفكر انه ربما طاح فشي حفرة ديال الصرف الصحي , حاول يعيط لصحابو و لكين حتا واحد مكيجاوب, الا واحد البنت لي كان قبل معاها فعلاقة و لكين انفاصلو, زاوكها تجي تعتقو حيث رجلو مضروبة و ميقدر يخرج من تما, ملي جات البنت للبلاصة لي هو كان حاسب انه طاح فيها مالقات والو تما لا حفرة و لا هم يحزنون.
كدوز بزاف ديال الاحداث و خونا غادي يعرف انه مطاح لا فحفرة لا والو, و لكين شي واحد دار ليه شي فانيدة فالكاس ملي كان فالبار و من بعد ملي خرج وفقد الوعي ديالو اختاطفو و داه لشي بلاصة بعيدة و رماه فبير, من بعد غادي يتاضح ان خونا عندو واحد لماضي مقاود و ان هاد شي لي واقع ليه دابا ماهو الا واحد الانتقام من حاجة دارها من قبل.
غا نوقف هنا باش ما نحرق كثر,
فلم زويون و مشوق,